Новости филиалов

Сирдарёлик акушер—гинеколог, танловда Президент совғаси — “Cobalt” автомобилини қулга киритди

Ўзбекистон касаба уюшмалари федерацияси томонидан ташкил этилган "Хотин-қизлар муаммоларини тизимли равишда ҳал этиш, уларни ижтимоий қўллаб-қувватлаш" бўйича Республика танлови якунланди.

Куни кеча, пойтахтимизда 11 ноябрь — Ўзбекистон касаба уюшмалари кунига бағишланган тантанали байрам тадбири бўлиб ўтди.

Унда,  “Аёллар дафтари”га киритилган хотин-қизларнинг муаммоларини ҳал этиш ва уларга моддий-маънавий кўмаклашиш, бандлигини таъминлаш, кредит олиши ва тадбиркорлик фаолиятини бошлашларига амалий ёрдам бериб, фидокорона меҳнати билан барчага ўрнак бўлаётган масъулларни муносиб рағбатлантириш мақсадида Касаба уюшмалари Федерацияси томонидан республика миқёсида ўтказилган танлов ғолиблари ҳам иштирок этди.

Улар, ҳудудларда ўтказилган,   “Энг яхши маҳалла раиси”, “Энг яхши сектор раҳбари”, “Энг намунали иш берувчи аёл”, “Энг яхши ҳоким ёрдамчиси”, “Энг яхши ёшлар етакчиси”, “Энг яхши хотин-қизлар фаоли” номинацияларини қулга киритишган эди.

Энг қувонарли томони, улар орасида сирдарёлик акушер—гинеколог, Сирдарё вилоят перинатал маркази директори Ханифа Содиқовани борлиги, сирдарёлик тиббиёт ходимларга, қолаверса унинг яқинларига қувонч бағишлади.

—Биласизми, дунёда касблар кўпу, лекин шифокорлик ғоят масъулиятли ва шарафлидир,—дейди Сирдарё вилоят перинатал марказ директори Ханиф Содиқова. —Шу касбни танлаб, сира-сира адашмаган эканман. Куни кеча, Пойтахтда   Ўзбекистон касаба уюшмалари кунига бағишланган тантанали байрам тадбирида иштирок этиб, бунга яна бир бор амин бўлдим. Рости, қувончимни чеги—чегараси йўқ.  Менга, “Энг намунали иш берувчи аёл” номинацияси бўйича,  2-даражали диплом ҳамда Президент совғаси — “Cobalt” автомобили калитини топширганда, кўз унгимдан  умр йўлларим, касбдошларим, уларни аҳоли саломатлиги сақлаш борасида олиб бораётган, шарафли ва машаққатли меҳнат фаолияти ўтди. Бу мукофот нафақат меники, уларники ҳам. Чунки, улар ёрдами сабаб бунга эришдим.